Pas pretendimeve të fundit në lidhje me funksionimin e Spitali Universitar i Traumës, ka reaguar Ministria e Shëndetësisë dhe Mbrojtjes Sociale, duke sqaruar se shërbimet vijojnë normalisht dhe nuk ka ndërprerje të aktivitetit.
Sipas ministrisë, procesi i rikonstruksionit në ambientet e spitalit po zhvillohet me faza, pikërisht për të shmangur pengesat në trajtimin e pacientëve. Autoritetet theksojnë se blloku i urgjencës është plotësisht funksional dhe i organizuar për të përballuar çdo rast.
Në reagim bëhet me dije se edhe shërbimi i kirurgjisë ortopedike vijon pa ndërprerje, duke operuar me dy turne, përfshirë edhe fundjavat, për të përballuar fluksin e pacientëve.
Po ashtu, garantohet se standardet e sigurisë higjieno-sanitare janë në nivele të larta, me monitorim të vazhdueshëm të sallave operatore, të cilat sipas institucioneve nuk paraqesin rrezik bakterial.
Ministria shton se nuk ka mungesë të medikamenteve apo materialeve mjekësore, duke siguruar vijimësinë e trajtimit për çdo pacient.
Spitali Universitar i Traumës mbetet një nga strukturat kryesore të sistemit shëndetësor në vend, i angazhuar për të garantuar shërbim cilësor dhe për të përballuar çdo fluks pacientësh.
-
-
-
-
-
-
-