Taksitë fluturuese elektrike do të nisin të testohen në SHBA

Një revolucion i ri në aviacion mund të mos ndodhë në lartësi të mëdha, por vetëm disa qindra metra mbi qytete. Këtë qershor, Department of Transportation do të nisë një program pilot kombëtar trevjeçar që lejon fluturime të kufizuara për avionë elektrikë dhe hibridë me ngritje vertikale, të njohur si eVTOL. Programi përfshin tetë projekte në zona të përzgjedhura të hapësirës ajrore amerikane, përfshirë Texas, Florida, New Jork, New Jersey dhe Albuquerque në New Mexico.

Qëllimi i iniciativës është të studiohet se si teknologjitë e avancuara të lëvizshmërisë ajrore mund të integrohen në mënyrë të sigurt në hapësirën ajrore kombëtare dhe të ndihmojnë në hartimin e rregulloreve të ardhshme të Federal Aviation Administration. Këta avionë përdorin zakonisht shtytje elektrike të shpërndarë, me shumë rotorë të vegjël dhe sisteme dixhitale fluturimi, duke ofruar zhurmë më të ulët, mirëmbajtje më të thjeshtë dhe emetime shumë më të reduktuara krahasuar me helikopterët tradicionalë.

Në krye të këtij zhvillimi janë disa startup-e amerikane. Archer Aviation do të testojë taksinë ajrore elektrike Midnight, e mbështetur nga United Airlines dhe Stellantis. Joby Aviation, e përkrahur nga Toyota dhe JetBlue Ventures, si dhe Beta Technologies dhe Electra, janë gjithashtu pjesë e programit.

Megjithëse disa modele synojnë autonominë, FAA thekson se nuk do të ketë fluturime autonome pa certifikim të plotë. Programi pilot nuk anashkalon sigurinë, por do të mbledhë të dhëna për dizajnin e avionëve, trajnimin e pilotëve dhe menaxhimin e trafikut ajror. Nëse rezultatet janë pozitive, eVTOL-et mund të hapin rrugën për transport urban, logjistikë, emergjenca mjekësore dhe përdorime të tjera, duke ndryshuar mënyrën se si lëvizim në qytetet e së ardhmes.

The post Taksitë fluturuese elektrike do të nisin të testohen në SHBA first appeared on Geek Room.