Transporti publik në Shkodër, nis qarkullimi çdo 20 minuta nga mëngjesi deri në mbrëmje

Transporti publik në Shkodër hyn në një fazë të re organizimi, duke ofruar tashmë shërbim të rregullt çdo 20 minuta përgjatë gjithë ditës. Nga ora 06:00 e mëngjesit deri në 22:00 të mbrëmjes, qytetarët kanë mundësi të lëvizin më lehtë, me një frekuencë të qëndrueshme dhe më të parashikueshme.

Përfaqësuesi i firmës së transportit publik, Melidion Dervishi, thekson se ky ndryshim synon rritjen e cilësisë së shërbimit dhe përmirësimin e përvojës për qytetarët.

Ndërkohë, nga Bashkia Shkodër bëhet e ditur se organizimi i ri është menduar për të respektuar kohën e përdoruesve dhe për të garantuar një shërbim më funksional dhe të besueshëm.

Frekuenca e rregullt e autobusëve pritet të sjellë më shumë qetësi në lëvizje dhe ta kthejë transportin publik në një alternativë më praktike për përditshmërinë, duke ndikuar drejtpërdrejt në përmirësimin e organizimit të jetës urbane në qytet.