Shkollat publike të New York pritet të ndalojnë përdorimin e inteligjencës artificiale nga nxënësit deri në klasën e tetë, që zakonisht përfshin fëmijë deri në moshën 13 ose 14 vjeç. Rregullat e reja do të hyjnë në fuqi javën e ardhshme dhe janë pjesë e një reforme më të gjerë të përdorimit të teknologjisë në distriktin më të madh shkollor në SHBA, me rreth 900 mijë nxënës.

Sipas politikës së re, përdorimi i AI do të lejohet vetëm në shkollën e mesme, duke nisur nga klasa e nëntë, dhe edhe atëherë do të kufizohet kryesisht në raste si mësimi mbi vetë teknologjinë. Gjithashtu do të ndalohen chatbot-et e AI që ofrojnë mbështetje psikologjike.

Vendimi vjen pas shqetësimeve të prindërve dhe mësuesve për ndikimin e AI-së në zhvillimin njohës dhe shëndetin mendor të fëmijëve. Studiuesit kanë paralajmëruar për fenomenin e quajtur “dorëzimi kognitiv”, ku përdoruesit ia delegojnë proceset e arsyetimit softuerit në vend që t’i kryejnë vetë.

Ndërkohë, mësuesit do të mund ta përdorin AI për përgatitjen e mësimeve dhe komunikimin me prindërit, por nuk do të lejohen ta përdorin për vlerësimin e detyrave të nxënësve.

New York do të kufizojë gjithashtu përdorimin e pajisjeve elektronike deri në 45 minuta në ditë për nxënësit e shkollës së mesme dhe 30 minuta për nxënësit më të vegjël.

Pas kritikave ndaj një kuadri më liberal të publikuar në mars, qyteti do të krijojë një grup pune me mësues, ekspertë, zyrtarë dhe përfaqësues të sindikatave. Raporti i tij, që pritet në prill, do të shërbejë si bazë për politikën e ardhshme të New York-ut mbi AI në shkolla.

The post New York ndalon përdorimin e AI në shkollat publike për fëmijët deri në klasën e 8 first appeared on Geek Room.