Zelensky: Furnizimet ushtarake për Ukrainën kanë rifilluar
publikuar nga Elidona Aga, ne #Euronews. ora 18:35
Presidenti ukrainas, Volodymyr Zelensky, ka konfirmuar gjatë një video-adrese në mbrëmje se furnizimet ushtarake për Ukrainën kanë rifilluar, duke theksuar se ka sinjale pozitive nga partnerët ndërkombëtarë, përfshirë Shtetet e Bashkuara dhe vendet evropiane.
“Ne kemi sinjale politike në nivelin më të lartë – sinjale të mira, veçanërisht nga Shtetet e Bashkuara të Amerikës dhe miqtë tanë evropianë. Sipas të gjitha raporteve, furnizimet kanë rifilluar,” tha Zelenskyy, duke theksuar se Ukraina po punon ngushtë me partnerët e saj për të siguruar furnizime të reja dhe për të rritur prodhimin e armëve në vend.
Kreu i shtetit nënvizoi se tashmë janë arritur disa marrëveshje të rëndësishme, dhe se po punojnë për të arritur edhe më shumë. Ai theksoi se është e rëndësishme që çdo marrëveshje të zbatohet me shpejtësi, për të siguruar forcimin e ushtrisë ukrainase dhe mbështetje të vazhdueshme për mbrojtjen e saj.
“Është e rëndësishme që çdo marrëveshje të zbatohet sa më shpejt të jetë e mundur, në mënyrë që të ndihet vërtet se ka më shumë forca, më shumë mjete, më shumë mbrojtje nga qielli, më shumë sisteme të mbrojtjes ajrore. Ky është një përparësi kyçe,” shtoi Zelensky.