Kampionati Ndërkombëtar i Fluturimeve të Lira, 50 pjesmarrës në ‘Korça Open Air’!
Në Korçë është zhvilluar Kampionati Ndërkombëtar i Fluturimeve të Lira. Për 3 ditë me radhë, në garën e zhvilluar në fushën e aviacionit sportiv në Lumalas, kanë marrë pjesë rreth 50 sportistë nga Shqipëria, Kosova dhe vende të ndryshme të Europës.
"Gara është me ngritje me vericele. Janë rreth 45-50 garues nga kombi, vendet përreth, Anglia, Belgjika. Është super finalja e precizionit. Është promovim i qytetit, zonës, është një nga testet që përgatisim dosjen në Federatën Ndërkombëtare që të sjellim një kampionat botëror në Korçë”, thotë Alket Islami.
Sporti i fluturimeve me deltaplan ka filluar të përhapet vitet e fundit, madje në mosha të ndryshme.
"Unë jam Arbër Shala. Jam 13 vjeç. Kam nisur kur kam qenë i vogël, por tani me pëlqen shumë. Kam dy vjet që merrem me këtë sport. Në Korçë po kënaqem shumë, kjo është gara e dytë”, thotë një sportist nga Kosova.
"Mirë, kushtet pak të vështira me erën. Janë promovim, i bën mirë vendit. Të rinjtë na shohin e janë të interesuar. Në Kosovë po zhvillohet shumë, njësoj si në Shqipëri”, thotë sportisti tjetër nga Kosova.
Për njërën nga sportistet e huaja që mori pjesë në këtë kampionat, Shqipëria është një nga vendet që di të organizojë më së miri aktivitete të tilla sportive.
"Vij nga Bullgaria. Nuk është hera e parë në Shqipëri. Vij shpesh, sepse këtu bëhen garat më të bukura në Europë. Shkojmë në Vlorë në verë, ndërsa në dimër vijmë në Korçë. E duam Shqipërinë”, thotë një nga sportistet pjesmarrëse.
Garat e këtij viti janë zhvilluar përgjatë 3 ditëve në juglindje të vendit.