Shfrytëzonin për prostitucion 5 shtetase kineze, arrestohen 2 persona në Tiranë

publikuar nga Suela Meno, ne #Euronews. ora 12:48

Policia e Tiranës ka arrestuar 2 persona, një burrë dhe një grua, të cilët shfrytëzonin për prostitucion 5 shtetase kineze.

Gjatë operacionit të koduar Red Light 3 u ndaluan shtetasit A. Ë., 45 vjeçe, Zh. Y., 30 vjeç, për veprat penale "Trafikimi i personave të rritur”, "Shfrytëzimi i prostitucionit” dhe "Mbajtja e lokaleve për prostitucion”, kryer në bashkëpunim,

Gjithashtu, u proceduan në gjendje të lirë për veprën penale "Prostitucioni”, parashikuar nga neni 113 i Kodit Penal, 5 shtetase kineze, si dhe për veprën penale "Moskallëzimi i krimit”, shtetasi G. L., 62 vjeç, banues në Tiranë.

“Nga veprimet hetimore të kryera në kuadër të procedimit, ka rezultuar se shtetasit A. Ë. dhe Zh. Y., në bashkëpunim me njëri-tjetrin, kanë sjellë në Shqipëri, 5 shtetase të huaja, të cilave iu kanë premtuar se do t’i punësonin në qendra masazhesh në Shqipëri. Pasi këto shtetase kanë arritur në vendin tonë, dy të arrestuarit i kanë shfrytëzuar për prostitucion, në ambiente (apartamente) të marra me qira. Nga veprimet hetimore është dokumentuar ligjërisht fakti se autorët e dyshuar i reklamonin në faqe online, shtetaset që i shfrytëzonin për prostitucion, gjenin klientët, i prisnin ata në hyrjen e pallatit ku ushtrohej prostitucioni dhe pas kryerjes së pagesave që varionin nga 200-300 euro, i dërgonin klientët në apartament”, bëri me dije policia.